Вышня Писана - Село в краю Русинів

Тото невелике село з малым чіслом жытелїв лежыть в северній части Низкых Бескидів під главным карпатьскым верьхом, 14 кілометрів северовыходно од Свідника. Граничіть з Польсков републіков, в єй хотарю ся находить найвысше положене місце свідницького окресу – верьх Ставок.

Жывот людей той приграничной теріторії не быв нияк легкый в минулости (тяжкы бої в часї 2. світовой войны), але не є ани днесь, кідь в краю суть мінімалны можности роботы а кліматічны условія дають малы предположіня на польногосподарьске выужытя краю. Забеспечіня холем основных потреб родины выжадовало як в минулости, так і днесь, в часї великой незаместнаности, тверду роботу при обгосподарёваню мало уродной землї. Напрік тому, круты зимы зо снїгобіло заснїженым краём вытваряють неопаковательну атмосферу прекрасной природной сценерії, главно в часї Рождественных свят. Прекрасна природа помагала людём вношати до жывота холем мале світелко радости. В їх тяжкім жывотї їм все была на помочі і віра. Так то є доднесь. В селї є ґрекокатолицька церьков, котра є засвячена успенію Пресвятой Богородицї.

Прекрасна природна сценерія хотаря нашого села каждорічно притягує турістів з різных кутів републікы і споза границь. Традіціёв ся став выступ на найвысшый верьх – Ставок, котрый абсолвовали стовкы навщівників. Охабте ся і Вы вести нашым краём, попровадить Вас наша вебова сторінка.