Школство
В селї, як і на околіцї была довгый час низка уровень освіты. Перед першов світовов войнов ходили школярї до Ґрекокатолицькой церьковной школы в Нижнїй Писаній, но выслїдкы школованя были барз слабы, бо дїти ходили до школы лем тогды, кідь не было роботы дома, на ґаздівстві. Другым неприязным моментом быв факт, же главны предметы ся учіли по мадярьскы. Першу інформацію о школї сьме нашли з 1861 року, коли кантором і учітелём быв Андрій Гладоник, правдоподобно селян з высшов освітов.
У 1922 роцї ту была зряджена Штатна народна школа зо словеньскым языком навчаня, котру в шк. роцї 1943/44 переменовали на Ґрекокатолицьку народну школу. Дїти до нёй ходили до лїта 1944, коли у звязи з приближованём фронты было выучованя перерушене. За тот період уровень освіты значно підросла, причім была цалком зліквідована неґрамотность молодых людей.
По переходї фронты ся дїти з Вышнёй Писаной вернули до школы аж восени у 1946 року. В тім часї была в Нижнїй Писаній Штатна руська (в значіню русиньска) народна школа з руськым (русиньскым) языком навчаня.
Аж у 1949 роцї была створена Штатна руська народна школа у Вышнїй Писаній. Дїти ся учіли в деревянім бараку, котрый село перевезло з Капішовой. В школї была і школьска книжніця, котра мала 100 книжок, учітельска книжніця мала 55 книг. Од септембра 1953 ся зачало навчаня в україньскім языку (котрый ся подля офіціалной лінії поважовав за материньскый язык Русинів).
Од школьского року 1960/1961 была установлена 9-річна повинна основна школа і так взникали ОДШ (основны девятьрічны школы – ZDŠ). З Вышнёй Писаной доходжали дїти надале до Кружлёвой а то на другый ступінь, до 6. – 9. клас.
В селї была збудована нова єднокласна народна школа про 1. – 5. класы, в котрій ся зачало учіти в шк. роцї 1961/1962. На жадость родічів у шк. роцї 1963/64 настає зміна навчалного языка з україньского на словеньскый. Україньскый язык ся ту надале учів як неповинный предмет.
Поступне зменшованя чісла молодых людей у селї мав за наслїдок недостаток школоповинных дїтей. Зато была ОДШ про класы 1. – 5. у Вышнїй Писаній в роцї 1976 зрушена. Од 1978 року мать бывшу школу у властництві Дїтьскый домов у Свіднику, котрый ту зрядив у 1982 роцї хату на рекреованя. В сучасности дїти з Вышнёй Писаной ходять до основнах школ у Свіднику.
Першов директорков школы у Вышнїй Писаній была Марія Онуферова (1949). В далшых роках в селї учіли учітелї Гелена Шустерова (1949 – 1952), Марія Зощакова, выдата Родакова (1952 – 1960), Михал Ґреш (1960 – 1974) і Янко Калиняк (1974 – 1976).
