Перша світова война
Зачаток 20. стороча принїс тому реґіону далше стражданя – першу світову войну. По выголошіню мобілізації наступили до армады способны хлопи у віцї до 50 років. Так зістали ґаздівства без робітных рук.
Такой на зачатку войны, восени 1914, руська армада під веджінём А. А. Брусілова атаковала карпатьскы перевалы. Вояци цісарьско-кралёвской армады брали што ся дало а перед приходом руськых войск село підпалили. Руськы войска были протиатаком з того боку Карпат вытиснуты, але їх атак ся знову повторив. Аж на перевалї коло Ґорлиць у роцї 1915 были дефінітівно вытиснуты з Карпат. Бої в хотарю села сі выжадали много людьскых жертв і запрічінили великы матеріалны шкоды, село было знічене на 60 процент. Свідоцтвом тых боїв є днесь уж скоро забытый воєньскый цінтерь в селї, де в 15-тёх гробах є похованых 21 вояків. В 13-тёх гробах лежыть по єден вояк, в єднім суть похованы двоме а в єднім шестёме вояци.
Война сі выжадала і людьскы жертвы зо села. При маніпулації з дєлострїлецькым ґранатом стратив жывот у роцї 1922 Василь Юрчішін і Павел Гвозда.
По переходї фронту сі люде выбудовали провізорны обыстя. Обнова села тримала аж до років 1923 – 24, бо по скінчіню войны ту не было ниякой можности зарібку. Пять мурованых хыж было поставленых в рамках штатной акції, остатнї сі люде збудовали самы.
